PRIMA CA JUNCI LU SCURU
di Lina La Mattina
C’era ancora lu suli all'ura di l'Avimmaria...
muzzicava leggiu l’ultimi agnuni, l’ultimi canali
affuddati d’antinni, l’ultimi cimi e pampini d’arbuli
ca si turcèvanu ammuttannusi una cu l’autra
p’arrubbarisi l’ulima carizza, l’ultimu oru…
sapennu ca forsi la nova alba li puteva truvari
sicchi, ‘ncrucculuti o macari pistati sutta li pedi.
Liggi di natura voli ca nuddu sapi quannu lu roggiu
batti l’ultima ura e si ferma pri qualcunu
né ciuri omini armala, né si po’ accattari lu minutu
puru siddu certuni, fincènnu umilitati, s’assettanu
supra l’ultimu scaluni, supra lu scrannu cchiù autu
di lu sapiri, comu fussiru dipositari di liggi, sintezi
tistamenti…sapituri di lu vuliri di lu celu e di lu Maistru.
E dittanu liggi a gritta e manca
cunnànnanu assassini e giustizieri, prima di lu tempu…
giudicanu, assolvinu, fannu di tutta l’erba un fasciu
parrànnu di liggi fatti su misura a propriu usu e cunsumu…
fannu la murali ma si scordannu di la vera liggi Divina
di ‘nzoccu Diu addumanna e ‘nzigna cu li cumannamenti
senza pinzari ca p’ammustrari amuri a Diu ci vonnu fatti!
C’era ancora lu suli assira, muzzicava leggiu
puru li cori, arrialava ad ognunu l’ultima ‘n gagghia
di lustru, p’alluminari la cammara scurusa
‘nchiusa a duppia mannata di la cuscenza
e comu la pampina ca si torci e ammutta p’arrubbari
l’ultima carizza, sapennu ca forsi l’arbulu si spogghia
puru nuàutri essiri umani, n’avissimu a spugghiari nudi.
Spugghiarinni di moralismu pregiudiziu e prisunzioni
di fausi palori d’amuri ca puncinu ‘nveci d’accarizzari
e vestiri li duri e rozzi panni di l’umìlitati
pirchì finu a postu la jurnata nun mi risulta ca qualcunu
pussedi la chiavi di lu granni mistèriu Divinu
la chiavi di lu celu ca tutti li porti grapi…semu sulu fangu
a cui Diu vosi dari l’alitu Divinu, ma spissu lu scurdamu.
Perciò ogni jornu, ogni sira n’avissimu affuddari
comu li pampini, pri fari trasiri l’ultima stizza di suli
‘ntra l’arma, pri sciogghiri gruppa dubbi piccati
ca tutti nni purtamu comu catina a lu pedi, prima ca scura
prima ca nudi comu vermi m’ancora chini di tracutanza
turnamu a Diu, a lu so’ giudiziu, ognunu cu lu so’ pisu
lu so’ carricu, lu so’ lustru o lu scuru, lu sbarazzu o li negghi
siddu nun àppimu tempu o nun vòsimu fari pulizia!
di Lina La Mattina
C’era ancora lu suli all'ura di l'Avimmaria...
muzzicava leggiu l’ultimi agnuni, l’ultimi canali
affuddati d’antinni, l’ultimi cimi e pampini d’arbuli
ca si turcèvanu ammuttannusi una cu l’autra
p’arrubbarisi l’ulima carizza, l’ultimu oru…
sapennu ca forsi la nova alba li puteva truvari
sicchi, ‘ncrucculuti o macari pistati sutta li pedi.
Liggi di natura voli ca nuddu sapi quannu lu roggiu
batti l’ultima ura e si ferma pri qualcunu
né ciuri omini armala, né si po’ accattari lu minutu
puru siddu certuni, fincènnu umilitati, s’assettanu
supra l’ultimu scaluni, supra lu scrannu cchiù autu
di lu sapiri, comu fussiru dipositari di liggi, sintezi
tistamenti…sapituri di lu vuliri di lu celu e di lu Maistru.
E dittanu liggi a gritta e manca
cunnànnanu assassini e giustizieri, prima di lu tempu…
giudicanu, assolvinu, fannu di tutta l’erba un fasciu
parrànnu di liggi fatti su misura a propriu usu e cunsumu…
fannu la murali ma si scordannu di la vera liggi Divina
di ‘nzoccu Diu addumanna e ‘nzigna cu li cumannamenti
senza pinzari ca p’ammustrari amuri a Diu ci vonnu fatti!
C’era ancora lu suli assira, muzzicava leggiu
puru li cori, arrialava ad ognunu l’ultima ‘n gagghia
di lustru, p’alluminari la cammara scurusa
‘nchiusa a duppia mannata di la cuscenza
e comu la pampina ca si torci e ammutta p’arrubbari
l’ultima carizza, sapennu ca forsi l’arbulu si spogghia
puru nuàutri essiri umani, n’avissimu a spugghiari nudi.
Spugghiarinni di moralismu pregiudiziu e prisunzioni
di fausi palori d’amuri ca puncinu ‘nveci d’accarizzari
e vestiri li duri e rozzi panni di l’umìlitati
pirchì finu a postu la jurnata nun mi risulta ca qualcunu
pussedi la chiavi di lu granni mistèriu Divinu
la chiavi di lu celu ca tutti li porti grapi…semu sulu fangu
a cui Diu vosi dari l’alitu Divinu, ma spissu lu scurdamu.
Perciò ogni jornu, ogni sira n’avissimu affuddari
comu li pampini, pri fari trasiri l’ultima stizza di suli
‘ntra l’arma, pri sciogghiri gruppa dubbi piccati
ca tutti nni purtamu comu catina a lu pedi, prima ca scura
prima ca nudi comu vermi m’ancora chini di tracutanza
turnamu a Diu, a lu so’ giudiziu, ognunu cu lu so’ pisu
lu so’ carricu, lu so’ lustru o lu scuru, lu sbarazzu o li negghi
siddu nun àppimu tempu o nun vòsimu fari pulizia!